Yuz jildlikning 4-jildidan, ulugʻ Alisher Navoiy iborasi bilan aytganda, "Turkiston mulkining shayxul mashoyixi, Turkiston ahlining qiblai duosi", turkiy xalqlar she'riyatining peshvolaridan biri Ahmad Yassaviy hikmatlari oʻrin olgan. Yassaviy hazratlarining oʻzi "Qul Xoja Ahmad, har bir soʻzing dardga darmon" satrli she'rida Yaratgan Egamning amri ila 4400 hikmat bitganini yozadi. Eng avvalo, insonni e'zozlashga da'vat etguvchi bu hikmatlar nihoyatda xalqchil, ravon tilda bitilgan. Buyuk shoir, karomatli ulamoning kindik qoni tomgan Sayram - Isfijob - Tiroz, unga tutash hududlardagi Yassi, Langar, Iyqon, Oʻtror, Turbat, Toroz va boshqa muqaddasu mukarram maskanlar qadimdan ulugʻ avliyolar poyqadami tekkan joylardir. Ahmad Yassaviyning shuhrati Sayram va Yassidan lochindek parvoz qilib Samarqandu Sigʻnoq, Qashqaru Qoʻqon, Oʻzgandu Xoʻjand, Bolosogʻunu Buxoro, Oʻshu Shosh, Gurganju Ganja, Mashhadu Marv, Izmiru Nishopur, Damashqu Hamadon, Bagʻdodu Basra, Makkayu Madinaga yetdi. "Sulton ul-orifin" adabiy merosini oʻrganish borasida taniqli olimlardan A.Fitrat, A.Sa'diy, F.Koʻprilizoda, V.Zohidov, N.Mallayev, Ye.Bertels, A.Borovkov, A.Abuov, I.Haqqulov va boshqalarning mashaqqatli mehnatlari e'tirofga loyiqdir. 4-jilddan Yassaviyning zamondoshi, shogirdi Sulaymon Boqirgʻoniyning dilbar she'rlari ham oʻrin oldi. Azim daryolar yuksak togʻlardagi boqiy sarchashmalardan boshlangani kabi mumtoz she'riyatimizning Atoiy, Sakkokiy, Saroyi, Gadoiy, Lutfiy kabi ulugʻlari ijodi nafaqat Yassaviy, balki Hakim Ota, ya'ni Sulaymon Boqirgʻoniy bulogʻidan kuch oladi. Ushbu magʻzi toʻq jild iste'dodli tadqiqotchilarimizdan S.Ra'fiddin va N.Hasan tomonidan nashrga tayyorlandi.