Antologiyaning 40-jildiga atoqli turk adibi Nomiq Kamolning "Jaloliddin Xorazmshoh" dramasi (Xurshid Davron tarjima qilgan), she'rlari kiritildi. Dramaning shuhrati bois Mehmed afandi (adibning asl ismi) surgundan qaytarilib, yuqori lavozimga tayinlanadi. U XIX asrning uchinchi choragida bir necha roman ham yozib, oʻz adabiyotida ushbu janrning shakllanishiga keng yoʻl ochib berdi. "Dengiz kabi har doim joʻshqin koʻngil" egasi boʻlgan Rizo Tavfiq Fikrat ijodidan sara namunalar ham ushbu jilddan oʻrin oldi. Badiiy ijodni siyosiy faoliyat bilan uygʻun olib borgan shoir turk xalqi erk, ozod hayot lazzatlaridan bahramand boʻlishi lozimligini she'rlari uchun shior qildi. 40-jildga kirgan uchinchi muallif Nozim Hikmat nafaqat ulkan shoir, balki tinchlik uchun tolmas kurashchi sifatida dong taratdi. Jilddan uning "Inson manzaralari" asari ham oʻrin oldi. N.Hikmat she'rlarini dastlab H.Olimjon va M.Shayxzoda, keyingi davrda R.Parfi kabi atoqli shoirlarimiz ona tilimizga oʻgirdilar.